Ambas actividades trasladaranse ao sábado 18 de novembro

Ante a situación meteorolóxica adversa prevista para esta fin de semana, o Concello do Rosal suspende as actividades de homenaxe aos cabaqueiros previstas para este sábado 4 e domingo 5 de novembro. Coa previsión de entrada dunha nova borrasca de grande intensidade nas vindeiras horas, dende o 112 Galicia recoméndase cancelar todas as actividades programadas para sábado e domingo, tanto ao aire libre como a cuberto, para evitar que a veciñanza realice desprazamentos innecesarios.

A charla da doutora en Xeografía, profesora en Ensino Secundario e investigadora Ánxeles Verea Castelo sobre ‘Os fomentadores da industria do barro’ trasladarase ao sábado 18 de novembro. Será ás 11 horas no Centro Social Polivalente.

Pola súa banda, a demostración do traballo dos cabaqueiros terá lugar o mesmo día 18 en horario de tarde, a partir das 17.00 horas. A lectura do pregón será a cargo da propia Ánxeles Verea.