03 Out 2022 EURURAL TRAE AO ROSAL UNHA MESA INFORMATIVA SOBRE A NOVA ESTRATEXIA DE DESENVOLVEMENTO RURAL PARA O TERRITORIO
Será este martes 4 de outubro ás 20.00 horas no multiúsos
A Asociación de Desenvolvemento Galicia Suroeste EuRural xa comezou a elaboración da Estratexia de Desenvolvemento Local para os 13 concellos do seu territorio para o 2023-2027.
Para a elaboración desta estratexia porase en marcha un proceso participativo que busca a implicación dos sectores económicos, sociais e culturais do territorio e que comezará a vindeira semana con catro mesas informativas abertas a todo o público en concellos das catro comarcas que aglutina EuRural.
O martes 4 ás 20.00 horas as persoas interesadas poderán asistir ao encontro que se realizará no Multiusos do Rosal.
A propia estratexia recollerá unha proposta de actuacións para a elaboración da análise e diagnóstico do territorio, dos resultados dos PDR anteriores, así como unha proposta para o deseño dos proxectos piloto e de accións para a promoción da participación das mulleres nos órganos de goberno e toma de decisións.
Nos últimos tres anos, Eurural desenvolveu a través do Programa Leader 16 proxectos que supuxeron un investimento total de máis de 1,8 millóns de euros, dos que arredor de 620.000 euros foron financiados a través das convocatorias 2020-2021 e 2021-2022. Estas iniciativas, centradas na dixitalización, ampliación empresarial, no lecer ou na saúde, entre outros sectores, supuxeron a creación de 16 novos postos de traballo e a consolidación doutros 38 xa existentes.
