25 Mai 2018 IV CONCURSO DE XOVES INTÉRPRETES “ANTONIO GRANJA”

A Agrupación Musical do Rosal celebra esta fin de semana o seu  Concurso de Xoves Intérpretes “Antonio Granja”
Entre o sábado e o domingo participarán no certame 35 xoves músicos. Na súa categoría C  participarán intérpretes de toda Galicia e tamén chegados de Portugal.  
O certame, do que este ano se celebra a cuarta edición, naceu coa intención de ofrecer un  estímulo máis no estudio dos rapaces e rapazas da escola de música da Agrupación. O concurso  consta de tres categorías. Dúas delas están destinadas a alumnado da propia escola de música  ou compoñentes da Agrupación Musical do Rosal (de 10 a 12 anos a categoría A, e de 13 a 16  anos a categoría B). A terceira categoría, a C (de 17 a 23 anos) está aberta, dende a anterior  edición, a intérpretes de calquera procedencia. Esta categoría terá como atractivo, aparte dos  tres premios (de 500, 300 e 200 euros), que o gañador terá a oportunidade de actuar como  solista coa Banda da Agrupación nun concerto posterior. O concurso trata desta maneira de ser  un estímulo a xoves estudantes de música de calquera procedencia, e ten como obxectivo  converterse nun referente a nivel galego.
As categorías A e B terán lugar este sábado día 26 (17:30 e 19:00 horas respectivamente); a  categoría C desenrolarase o domingo día 27 e constará de dúas fases: unha eliminatoria (que  comezará ás 11:00 horas), e a fase final (ás 19:00 horas) onde sete finalistas competirán polos  tres premios. Todo isto terá lugar no Auditorio Municipal do Rosal, sede da Agrupación. Esta 4ª  edición do concurso conta coa inestimable axuda de, aparte do Concello do Rosal, de numerosas  empresas e comercios locais.