Máis de 20 músicos da Agrupación Musical do Rosal participarán nunha experiencia única de irmandade e cultura coa Asociación Músico Cultural de Cazalla de la Sierra e a Sociedad Musical San Antonio de Benagéber

Máis de 20 integrantes da Agrupación Musical do Rosal estarán esta Semana Santa na localidade sevillana de Cazalla de la Sierra para desfrutar dun intercambio musical único coa Asociación Músico Cultural de Cazalla de la Sierra e a Sociedad Musical San Antonio de Benagéber, unha experiencia de irmandade, cultura e música.

Serán unhas xornadas para tender pontes entre tres rexións cun inmenso legado cultural, tres estilos que se fundirán durante uns días para intercambiar arte entre as distintas agrupacións. Organizado pola AMC Cazalla de la Sierra, neste intercambio a música de Galicia, Andalucía e Comunidade Valenciana latexarán ao mesmo compás polas rúas de Cazalla de la Sierra, enchendo cada recuncho de harmonía, emoción e convivencia.

Durante a estadía, os músicos compartirán ensaios, actuacións e momentos de convivencia, creando lazos que van máis alá do musical. O intercambio servirá para fortalecer vínculos entre as agrupacións e fomentar o respecto e o amor polas diferentes expresións culturais que caracterizan cada territorio.