26 Nov 2025 O Rosal activa dous contratos formativos para o primeiro emprego de mocidade titulada
O Concello solicitará ao SEPE persoas desempregadas para cubrir dúas prazas financiadas pola Deputación de Pontevedra ao abeiro do programa +Emprega
O Rosal axuda á mocidade titulada a dar o seu primeiro paso profesional. O Concello solicitou dous contratos formativos dun ano dirixidos a persoas desempregadas que estean recentemente titulados Grao Superior en Administración e Finanzas ou no Grao en Ciencias Políticas e da Administración.
As contratacións realizaranse ao abeiro do programa +Emprega da Deputación de Pontevedra, polo que o Concello solicitará ao Servizo Público de Emprego (SEPE-INEM) candidaturas que cumpran os requisitos esixidos nas bases oficiais.
Ofrécese un contrato formativo dun ano de duración. Ademais da titulación, as persoas aspirantes deberán estar inscritas como demandantes de emprego ou en mellora de emprego no SEPE, empadroadas nalgún concello da provincia de Pontevedra, non ter transcorrido máis de 3 anos desde a finalización dos estudos ou non posuír experiencia ou formación superior a tres meses na mesma actividade dentro do Concello, entre outros requisitos.
