Visitará o 23 de decembro ás 17 h a biblioteca municipal cunha actividade de narración oral para público infantil e familiar

Unha xigante baixará das montañas do Courel guiada pola infinita tenrura para achegarse a O Rosal este Nadal. A Apalpadora Iseo A Moura, gardiá dos soños e das tradicións da terra, visitará o concello o luns 23 de decembro coas súas historias cheas de vida e memoria.

A Apalpadora encherá de ilusión a tarde dos máis pequenos e pequenas cunha actividade de narración oral para público infantil e familiar totalmente de balde a partir das 17.00 horas na biblioteca municipal.

A alcaldesa, Ánxela Fernández, destacou a importancia desta actividade como unha forma de conectar coas raíces e co patrimonio cultural galego. “A Apalpadora é moito máis que un personaxe máxico. Representa os valores da nosa terra, da vida sinxela, o amor á natureza e o coidado dos nosos cativos e cativas. Este Nadal queremos que o seu espírito nos axude a lembrar quen somos, sobre todo para que os máis pequenos e pequenas crezan con orgullo da nosa cultura”, explicou.