29 Mar 2022 O ROSAL DEBATE SOBRE A VESPA VELUTINA DA MAN DA INVESTIGADORA SANDRA ROJAS NOSSA
A doutora en Ecoloxía da Universidade de Vigo e apicultora dará unha charla o martes 5 de abril ás 19.00 h no Espazo de Autoarranxo
No ano 2012 detectáronse por primeira vez en Galicia dous niños de vespa velutina, unha especie exótica invasora procedente de Asia da que en 2017 xa se rexistraban máis de 21.000 niños en toda a comunidade autónoma. Para falar do impacto e dos métodos de control desta especie estará no Rosal Sandra Rojas Nossa, investigadora da Universidade de Vigo, doutora en Ecoloxía, apicultora e coautora dun estudo que constata o impacto negativo da vespa velutina no comportamento dos insectos polinizadores e na reprodución das plantas.
Rojas Nossa visitará o Espazo de Autoarranxo o vindeiro martes 5 de abril para dar unha charla no que afondar no tema a partir das 19.00 horas, con entrada de balde e libre ata completar aforo. Nela a investigadora falará da capacidade das velutinas para adaptarse a novas contornas e de cambiar dende unha parte do seu ciclo anual ao tipo de especies das que se alimenta, dos seus aspectos biolóxicos e dos problemas que causa por exemplo na apicultura, así como dos diferentes métodos para combatela.
