PR-G112 Sendeiro de Pescadores Río Miño-Tamuxe

Un cómodo paseo polas ribeiras de dous ríos polos que flúe vida, tradición e paisaxe

O Sendeiro de Pescadores dos ríos Miño e Tamuxe permite descubrir toda a riqueza natural, paisaxística, histórica e cultural relacionada con estes dous cursos fluviais. Os seus 7,5 km de lonxitude, que se percorren en aproximadamente hora e media, dan acceso a bosques de ribeira, zonas de esteiro e xunqueira, espazos de interese ornitolóxico, pontes históricas, un serradoiro a vapor, muíños hidráulicos e varias áreas de recreo.

A ruta está homologada (PR-G 112) e conta con sinalización indicativa e informativa. Nas distintas paradas hai paneis e balizas con información ambiental sobre a gran diversidade de especies de fauna e flora que hai nesta zona pertencente á Rede Natura 2000, pero tamén sobre os aspectos vinculados coa tradición pesqueira de especies como a lamprea, o sábalo e a anguía ou meixón, entre outras.

O percorrido, sen pendentes, inclúe zonas de sombra e varias áreas de recreo e descanso, o que a converte nunha opción especialmente cómoda para gozar en familia. Outra opción de turismo activo na zona é a de alugar un caiac para percorrer o Miño, visitar as pequenas illas a medio camiño da beira portuguesa e adentrarse no río Tamuxe.

O Concello do Rosal organiza nos meses de xullo e agosto visitas guiadas (previa inscrición) para coñecer os importantes valores ambientais, históricos, paisaxísticos e culturais do lugar.

Localización:
Praia das Eiras

Como chegar?

Coordenadas:
Praia das Eiras

41.925593, -8.777568
Coordenadas UTM: 29T X:517738 Y:4641266

Localización:
Muíño das Aceñas

Como chegar?

Coordenadas:
Muíño das Aceñas

41.922730, -8.825639
Coordenadas UTM: 29T X:514464 Y:4641193

Documento

PR-G 112 Sendeiro Pescadores Río Miño – Tamuxe

Ficha técnica

Sinalización: direccional + paneis informativos.

Dificultade: baixa.

Lonxitude: 7,5 km.

Duración: 1 hora e 30 minutos, aprox.

Percorrido

O Sendeiro de Pescadores ten un trazado lineal e pode facerse, seguindo a sinalización, en calquera dos dous sentidos. Pódese comezar na praia das Eiras, para rematar nas Aceñas, ou ben pódese partir da área recreativa das Aceñas para concluír nas Eiras. En ambos extremos da ruta hai espazo de aparcamento.

Saíndo desde As Eiras, estes son os principais puntos de interese:

 

Praia das Eiras e esteiro do Miño

Saíndo desde a praia fluvial das Eiras, a Senda dos Pescadores transcorre paralela ao río Miño baixo zonas de bosque autóctono e bosque de ribeira. A contorna do rego de San Miguel e ás vistas ás illas salvaxes situadas a medio camiño entre ribeira galega e a portuguesa son algunhas das paradas obrigadas no noso camiño.

Estas ínsuas (Morraceira das Varandas, Morraceira do Grilo e Canosa) teñen un grande valor ecolóxico, especialmente pola variedade de aves que albergan, moitas das cales acoden a esta zona para hibernar. O esteiro do Miño foi declarado Zona de Especial Protección de Aves (ZEPA), sendo un dos poucos pasos migratorios que a ruta entre o Norte de Europa e África ten na Península Ibérica.

https://vimeo.com/343171696

 

San Miguel

Desde As Eiras continuaremos a marcha cara a San Miguel de Tabagón onde atoparemos o campo de fútbol da Canosa e moi preto dunha pequena área recreativa con mesas, bancos e abundante sombra. Esta zona de descanso atópase ao carón da igrexa parroquial de San Miguel, que queda lixeiramente fóra do percorrido sinalizado. Non obstante, paga a pena desviarse uns metros para visitala.

Máis adiante, moi preto da Ponte do Tamuxe, atoparemos o embarcadoiro de San Miguel, acondicionado para a realización de actividades acuáticas.

 

Área recreativa do Tamuxe-Porto Vello

Seguindo en dirección á Ponte do Tamuxe chegaremos ao Porto Vello, un barrio que aínda conserva as pegadas do seu pasado industrial. Aquí atoparemos unha nova área recreativa e as ruínas dun antigo serradoiro de vapor.

A partir deste punto comeza o tramo final da Senda dos Pescadores, que discorre agora pola beira do río Tamuxe, afluente do Miño. Camiñaremos por zonas de piñeiral e fincas de cultivo particulares cos máis diversos cultivos: vide, kiwi, horta, flor, etc.

 

Área recreativa das Aceñas

O punto final deste percorrido lineal será a área recreativa das Aceñas, situada a algo máis de 7 km do lugar onde comezamos a nosa ruta. Este parque conta cunha zona habilitada para o baño, mesas e bancos e un gran muíño hidráulico nunha das beiras do río.

Galería